DEL

Anaanatut ummatinni anniarpunga DR-p  Tasiilaq pillugu DR-p piviusulersaarutaa takoreerlugulu. Tassunga atatillugu puigussanngilarput Tasiilamiinnaq meeqqat sumiginnarneqarneq ajormata. Piffissannorpoq ajornartorsiutit tamakkiisumik nassuerutiginissaanut avataaniillu ikiortissarsiorluta.

Innuttaqassuseq aallaavigalugu nunaarannguuvugut. Ilinniarsimassutsikkut nunanut killernut allanut naleqqiulluta kinguarsimaneruvugut. Najugaqariaaseq qiviarutsigu immitsinnut avinngarusimalluta inuiqatigiiaannguakkuutaarluta najugaqarpugut, aqqusinikkut tikinnissinnaanata tamatuma kinguneranik illoqarfimmi allami najugaqarsinnaanngilagut sulillutalu.

Pissutsit taakku pingasut pissutaallutik atorfiit pinngitsoorneqarsinnaanngitsut imaaliallaannaq inuttalerneqarsinnaaneq ajorput. Tamatta tamanna ajornartorsiut ilisimavarput. Aamma ajornartorsiut alla nalunngilluagarput tassaavoq meeqqat amerlavallaartut sumiginnarneqartarnerat – angajoqqaaminnit aamma pisortanit. Meerarpassuit ajornartorsiutitik nammineq ersuppaat aamma naammattumik ikiorneqanngisaannarput.

DR-p piviusulersaarutaata “Byen hvor børn forsvinder”-p paatsoorneqarsinnaanngitsumik takutippaa pissutsit qanoq ajortigisut. Aamma uanga nammineq oqaatigisinnaavara, ajornartorsiut Tasiilamiinnaq ajornartorsiutaanngimmat. Ajornartorsiut nunatsinni sumiluunniit siumugassaavoq.

Taamaattumik nuannaarutigaara parteeqamma Randi Vestergaard Evaldsenip siunnersuutigimmagu nuna tamakkerlugu aningaasanik immikkoortitsissasugut immikkut suliniuteqarnissatsinnut sulinermut ilanngaat unitsikkallarlugu. Atagu immikkut iliuuseqarluta meerarpassuit ajornartorsiuteqartut immikkut ikiorniariartigit.

Taamaakkaluartorli ingerlaqqillanga. Inuiaqatigiittut nakimaanniarnerput iperariartigu isumaqarunnaarlutalu suna tamaat sapernatigu. Ilinniarluarsimasunik amingaatilerujussuuvugut taamaasillutalu assigiinngitsunut ilisimasalinnik aamma amingaateqarluta. Ikiorneqartariaqarpugut meeqqat sumiginnakkat sapangivissanngikkutsigit. Pisariaqartipparput meeqqat taakku ikiorneqarnissaat pitsaasumik inuuneqaleqqullugit. Taamaattumik Naalakkersuisut nangaanatik Danmarki isumaqatiginiartariaqarpaat inunnik isumaginninnerup iluani ikiorneqarnissarput pillugu soorlu ilinniarsimasunik aamma immikkut ilisimasalinnik toqqaannartumik pisariaqartitsineq naapertorlugu eqqortumik ikiuinissaq pillugu.

Avataaniik ikiorneqarutta imaanngilaq inunnik isumaginninneq Danmarkimut tunniutissagipput. Imaaginnarpoq uagut politikerit sapinngisannguatsinnik meeqqanik atungarliortunik ikiuerusuttugut.

 

 

Eqqaamallugu; meeqqat pisuussutitsinni pingaarnersaapput. Inuiaqatigiittut nakimaattoorusunneq piinnarlugu pitsaanerpaamik ikiorneqarnissaat mattutissanngilarput.

Ikinngutinnersumik inuulluaqqusillunga
Nivi Olsen
Demokraatit sinnerlugi Inatsisartunut ilaasortaq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt