DEL

Demokraatini malugaarput imigassamut inatsisip qasukkaallanneqarnera kiffaanngissuseqarnerulaalernissamullu ammaassinera arlallit isornartorsioraat. Kingullermik KNR-ikkut isornartorsiuivoq Red Barnet.

Ingerlaannaq erseqqissarlara; Demokraatini sukaterinerit akerlerisimavagut Naalakkersuisut IA siuttoralugu kingullermik sukaterimmata, taamanilu qinersisartut neriorsorpagut, qinersereernerup kingorna sunniuteqarsinnaalissagaluarutta sukaterinerit tamarmik atorunnaarsinneqarumaartut. Neriorsuuterput eqqortipparput tamannalu perruualaarutigaarput.

Nalunngilarput inuiaqatigiinni suli imigassaq ajornartorsiutigalutigu. Kisianni IA isumaqatiginngilarput isumaqarmat aqqutissaq tassaasoq inerteqquteqarneq inuiaqatigiillu sutigut tamatigut nakkutigineqassasut. Kiffaanngissuseqarneq upperaarput. Aamma qularinngilluinnarparput inuit ataasiakkaat tamarmik pilluarnerussasut nammineq inuunerminnut annerpaamik aalajangiisinnaassuseqarunik.

Ataaseq inatsisissamut siunnersuutip oqaluuserineranut atatillugu eqqartorneqanngitsoortoq ataaseq tassaavoq pinngitsuuisinnaajunnaartartut katsorsarneqartarnissaat. Inatsisissatut siunnersuut 2018-mi Ukiakkut ataatsimiinnermi apeqqusiinnguarata akuerileraluagarput Demokraatit piumasaqarnerat naapertorlugu 2019-mi Upernaakkut oqaluuserisassanngorlugu kinguartipparput qulakkeerumallugu inatsisip nutaap sapinngisamik amerlanerpaanut iluaqusiinissaa.

Demokraatini kissaatigaarput pinngitsuuisinnaajunnaarsimasunik katsorsaanermut nukigut tamaasa atortariaqarigut.

Inuiaqatigiinni pikkorissunik ulikkaarpugut atunngisatsinnik, politikkikkut inuit taakku sulinissaminni sinaakkutissaat killilersornikuugatsigit.

Ataatsimiititaliami inatsisissatut siunnersuutip suliarinerani Demokraatini qulakkeernikuuarput tamatumap peqqinnginnissaa.

Isumaqarpugut eqqortuusinnaanngitsoq nukiit pitsassuit pigeriikkatta sapinngisamik pitsaanerpaamik atornissaannut sinaakkutit pisariaqartitagut pilersissinnaanngikkigut paarlattuanilli takuteqqiinnarparput qularluta nammineq katsorsaasutta pikkorissut suliassaq naammassisinnaagaat taamaattumillu politikkikkut akisussaaffik tiguinnarneqarpoq qulakkeerniarlugu annerpaamik nakkutilliinissaq. Taamatut periuseqarnissaq Demokraatini kissaatiginngilarput.

Upperaagut kikkulluunniit akisussaaqataarusullutik aalajangertut periarfissinneqartassasut tamannalu tunngaviuvoq Naalakkersuisunut piumasarigatsigu, innuttaasut kikkulluunniit tunngaviusumik katsortinnissamut neqeroorutit akuerisat ataqqineqartulluunniit aamma Kalaallit Nunaanni katsorsaasut atorlugit katsorsartissinnaassasut.

Imerajuttuuneq nappaataavoq aamma ammakkusupparput katsorsaariaatsit assigiinngitsut nunatsinni ammaanneqassasut, nalunnginnatsigu nakorsaat ataasiinnaq atorlugu peqqissisoqarsinnaanngitsoq, Kalaallit Nunaanni atornerluisunik katsorsaanermi nakorsaatip assingaa Allorfik, politikkikkut aalajangerneqarnikuummat pinngitsuuisinnaarsimasunik katsorsaanermik taakku annermik aallutaqassasut.

Imigassamut inatsisip allanngortinnera kiffaanngissutsip ajungaaneraa aamma inuit ataasiakkaat inuunererusutartik naapertorlugu inoorusuttuunerannut upperinninnerup ajungaaneraa. Aamma kiffaanngissuseqarusukkaanni taava kiffaanngissuseqarnissaq illersortariaqarpoq taamaattumik tamatigut kukkumik alloriarnerusarpoq innuttaasut kiffaanngissuseqarnissaat mangiarneqaraangat paarlattuanilli ajunngitsumut alloriartuaannarpugut kiffaanngissutsip alliallatsinneri tamaasa.

Taamatulli oqareerluta Red Barnet isumaqatigaarput oqarmata imigassamik atornerluineq akiorniarlugu nutaaliortuartariaqartugut. Aamma uanga isumaqarpunga aallartilluareerluta. Pinngitsuuisinnaajunnaarsimasunik katsorsaasarnissaq pillugu inatsit nutaaq iluarisimaaqaarput, inatsimmi nutaami qulakkeerneqarmat ajunnginnerusumik pitsaanerusumillu katsorsaasoqartalernissaa.

Taamaakkaluartorli imigassaq pillugu meeqqanut inuusuttunullu qaammarsaallaqqinnerusariaqarpugut, taakku imigassamik peqqinnartumik atuisaleqqullugit aamma kusanartumik imigassamik atuisaleqqullugit, imertaratik aalakoornissaq kisiat siunertaralugu. Tassani angajoqqaat angisoorsuarmik akisussaaffeqarput. Inersimasutut inuttullu akisussaassuseqartutut allatut ajornartumik paasisariaqarparput meeqqat iliuutsinut tarrarsortarmatta aamma taamaattumik tamanna tunngavigalugu iliuuseqartariaqarpugut.

Meeqqat atuarfii aamma angisuumik akisussaaffeqarput. Uanga nammineq kissaatigigaluarpara klassini tamani imigassap eqqartorneqartarnissaa aamma ilinniartitsissutigineqartalissasut imigassartorpallaarneq sunik ajoqutissarsivigineqarsinnaanersoq aamma imigassartorpallaarnerup suut ajortut nassatarisinnaanerai. Ulluni aalajangersimasumik qulequtaqarluni sammisaqarfinni qaqinneqarsinnaavoq innuttaasut akuutillugit soorlu imerajuttumik imerunnaarsimasumik oqalugiartitsisarluni.

Imigassamik peqqinnartumik atuisalernissaq pillugu meeqqat inuusuttullu perorsarneqarnissaat eqqarsaatigalugu aaqqiissutissaqanngilaq ajornanngitsuaqqanik. IA-p aamma naalakkersuisuusimasullu ajornannginnersiorlutik aaqqeeriaraluarput inerteqquteqarneq saagulersuinerlu atorlugit. Taama iliorneq inuit ataasiakkaat kiffaanngissusaannut sakkortuumik kanngutsaattuliorneruvoq qujanartumilli oqaluttuaannanngorpoq.

Ungasinngitsukkut pinngitsuuisinnaajunnaarsimasut katsorsarneqartarnissaat pillugu inatsit akuerineqarmat Inatsisartuni takutipparput pitsaasumik inatsisiliornissaq pitsaasumik suleqatigiissutigisinnaallutigu.

Upperaara neriullungalu suleqatigiilluta suliniutissanik aalajangersaasinnaassasugut aalakuupallanniarluni imertarneq akiorniarlugu qularnaarlugulu kinguariit tulliisa pitsaasumik perorsarsimarpalaartumillu imigassamik atuisalernissaat.

Inussiarnersumik inuulluaqqusillunga
Malene Vahl Rasmussen
Demokraatit sinnerlugit Inatsisartunut ilaasortaq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt