IA-p siulittaasuata tullia Aqqaluaq B. Egede tusagassiutinut allappoq, Demokraatiniit akisussaaffimmik tigusinissarput qunugigipput. Tassunga oqaannassaanga, Inatsisartunut qinersigattali angusatta nammineq takutippaa politikkikkut sunniuterput, periarfissarli iluatsillugu ilamininngui taalaassavakka.

2018-mi ataasiaannarluta Inatsisartunut qinersivugut. Tamatumunnga pissutaavoq Demokraatit akisussaaffimmik tigusinerat, IA isumaqatiginniarnerniit qimaanerata imaluunniit aninerata kingorna, tassami isumaqaraluaramik Naalakkersuisuni siulittaasunngortitsilerlutik. Kisianni nalunngisatsituut taama pisoqanngilaq.

Demokraatini taamani nalilerparput, nunatsinnut pitsaanavianngitsoq Inatsisartunut qinerseqqissagaluarutta. Taamaattumik naalakkersuisoqatigiit isumaqatigiissuteqarfigaagut amerlanerussusiisarniarluta. Taamaalioratta soorunami politikkimut ingerlanneqartumut sunniuteqaluarnissarput piumasaraarput.  Sunniuteqarlualerpugullu aammalu naalakkersuisoqatigiinnik suleqateqarneq oqaloqatigiinnermik tunngaveqarpoq ataqqeqatigiinnermillu. Tamatuma kinguneranik Demokraatiniit pingaartitagut arlallit piviusunngortippagut.

Imigassamut Inatsisip allanngortinnera assersuutigiinnarsinnaavarput. Ilulissani, Qaqortumi Nuummilu mittarfiliortiternissaq assersuutaasinnaalluarpoq aamma. Pisortat allaffissornerisa pitsanngorsarnissaat assersuutaavoq aamma alla. Ilaatigut aamma ingerlatseqatigiiffiit akileraarutaasa appartinnissaat assersuutit sisamaattut taalaaginnarsinnaavarput. Tassalu ilaannai.

Allatut oqaatigalugu, nalilerparput sunniuteqarluarnerusinnaalluta naalakkersuisoqatigiinnut amerlanerussusiisartutut. Imaassinnaavoq IA-jungaanni aatsaat sunniuteqartoqarsinnaavoq Naalakkersuisut biiliani akisuumi akissarsiarissaarluni issiagaanni, kisianni Demokraatiniit uagut allatut isumaqarpugut suleriuseqarlutalu. Tamakku pingaartitarinngilagut uagut. Politikki sapinngisamik pitsaanerpaaq atorlugu inuiaqatigiit pitsaanerpaat pilersinnissaat pingaarnerutipparput. Aamma tamanna sulisssutigiuarparput ullut tamarluinnaasa. Eqqaamajuaannassavarput sooq inatsisartuni issianerluta, tassa innuttaasut sullinnissaat pillugu, imminut sullinnissaq pinnagu.

Partii Naleqqap naalakkersuisoqatigiit qimammagit Demokraatinut ersarilluinnarsimavoq IA-p soqutigisatuarigaa Naalakkersuisunut siulittaasunngortitsinissani; Siumut peqataatinnagu naalakkersuisunngortitsinermigut imaluunniit ikerinnakkut Inatsisartunut qinersinikkut ajugaallutik. Uanga akisussaassuseqanngitsuliornertut tamanna taarusuppara – pissaaneq piinnarlugu pissaaneqarniarnertut.

Demokraatiniit uagut allaaneruvugut allatullu suleriuseqarluta. Politikkikkut angusaqarnissaq pingaarnerutipparput politikkittalu piviusunngortinnissaa. Aamma taamaaliortuarumaarpugut qanorluunniit IA-p siulittaasuata tullia qaputsigigaluarpat isumalioraluarpalluunniit.
IA-mulli neriorsuutigissuara naalakkersuisoqatigiinnik suleqateqarnerput nalilersortuaratsigu aammalu naalakkersuisoqatigiinnut tapersersuinerput politikkikkut angusaqarluarnissatsinnik nassataqartittuassallutigu.

Inussiarnersumik inuulluaqqusillunga
Randi Vestergaard Evaldsen
Politikkimut akisussaalluni siulittaasumut tullersorti aamma Inatsisartunut ilaasortaq

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt