Nunami maani politikerit taakkuupput oqartussaasut. Tamanna kimilluunniit paatsoorneqartariaqanngikkaluarpoq, malunnarporli Peqqissutsinut Naalakkersuisoqarfik paatsoorsimasoq. Sakkortunerpaamik erseqqissassavara Inatsisartuni aalajangerneqareersunik naalakkersuisoqarfiup suusupaginninnera Demokraatini akuerisinnaanngilluinnaratsigu.

Demokraatini takuarput imigassamut inatsimmi allannguut pillugu Naalakkersuisut tusarniaallutik aallartissimasut. Siunnersuutip annersaa 2018-mi Ukiakkut Inatsisartut ataatsimiimmata Demokraatit aalajangertitaannut naapertuuppoq.

Naammagilarli siunnersuutip annersaa taamaallaat akuerineqarmat. Inatsisartut aalajangiippata taava Naalakkersuisut aalajangerneqartoq malittussaavaat. Aamma Naalakkersuisoqarfik nammineerluni siunnersuutinut politikerit aalajangingaannut akerliusumik iliuuseqartussanngilaq. Tamanna namminissarsiorneruvoq politikkikkullu suleqatigeeriaatsimut akerliulluni.

Uani ajornartorsiut tigussaasoq tassaavoq imigassat pilerisaarutigineqartarnerannut inerteqqut. Tassani Demokraatini ersarilluinnartumik tunngavilersuutigaarput sooq pilerisaarinissamut inerteqqut sussaannginnersoq. Tamannalu Inatsisartuni ilalerneqarpoq.

Taamaattumik quarsaarnarpoq Peqqissutsimut Naalakkersuisoqarfiup inatsisissatut siunnersuut tusarniutigimmagu oqarluni Inatsisartut aalajangigaat naapertorlugu taamaaliortoqartoq taamaattumillu naammattoq suliffeqarfiit akuerineqarpata internettimi nammineq nittartakkani pilerisaarutit matoqqasumik ingerlanneqarsinnaasut. Taamatut Peqqissutsimut Naalakkersuisoqarfiup isumalersuinera siunnersuummi ersarissumik takuneqarsinnaasutut, politikerit siunertaannut tulluutinngilluinnarpoq.

Inatsisissatut siunnersuutip ilaa taanna uannut siunnersuuteqartumut taamatullu Inatsisartunut inatsisiliortunut ingasattajaartumik suusupaginninneruvoq.

Erseqqissassavara Naalakkersuisut tusagassiutinut nalunaarut taanna atussanngimmassuk allannguutissatut siunnersuummut tamakkiisumut kinguarsaatitut.  Allannguutit upernaaru inatsisartut ataatsimiilerpata akuerineqartussaapput, kiffaanngissuseqarnerulaalernissamut alloriarniassagatta aamma innuttaasut nammineq aalajangiisinnaassuseqarnerunissaannut.

Naalakkersuisunull paatsuugassaanngitsumik erseqqissassavara pilerisaanermut inerteqquteqarnerup atorunnaarsinneqarnissaa pillugu siunnersuutip ilaanik namminissarsiorluni isummersuineq aalajangiusimaneqaannassagaluarpat tamanna ajorluinnartumik kinguneqarsinnaammat.

Inussiarnersumik inuulluaqqusillunga
Randi Vestergaard Evaldsen
Inatsisartunut ilaasortaq.

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt