Demokraatit Sermersooq Kitaata kikkut tamaasa ukiortaami 2019-mi pilluaqquai – eqqaasitsissutigalugulu uangut ilaqutariinnut pitsaanerusussat sulissutigigatsigit
Sermersooq Kitaani Demokraatit: Ilaqutariit meerartallit salliullugit sullinneqalernissaannut piffissanngorpoq
Allattoq Anna Wangenheim, Nunap immikkoortuani siulittaasoq, Demokraatit Sermersooq Kitaa
Ukiorpassuarni Kommuneqarfik Sermersuup sulianik ataqqineqaatissarsortuarnikuuvoq, Siorarsiorfinniit mittarfissualiortiternissamut. Kisianni ulluinnarni inuunermi suliassat angisuut allat ersarissigaluttuinnarnikuupput nunap immikkoortuani Sermersooq Kitaani Demokraatit siulittaasuat aperissagaanni:
“Ukiuni amerlavallaani politikerit aqutsinerminni sulianik ataqqineqaatissarsiorpallaarsimapput ulluinnarni ajornartorsiutit isiginngitsuusaarlugit. Allatut ajornartumik pissutsit piviusut takusariaqalerpagut, tassani ajornartorsiutit annertoorsuupput meeqqeriveqarnerup iluani, utoqqarnik sullissinermi isumassuinermilu kiisalu peqqinnissaqarfimmi malinnaanipiloortumi ajornartorsiutit eqqarsaatigalugit, tassani innuttaasut amerliartornerisa sullissineq ilungersunartorsiortimmassuk. Allatut ajornartumik iliuusissanut pilersaarut piareertariaqarparput annerusumillu innuttaasut peqataatillugit inuiaqatigiinni ineriartornerup toqqissisimanartuunissaa pillugu”, taama oqarpoq Anna Wangenheim nangillunilu: “Meerartagut inuusuttagullu annaassavagut, maannamut naleqqiullugu pisariaqartitaasigut tapersersunngikkutsigit tamannalu uangutsinnut akisunerulerataannaavoq aamma minnerunngitsumik inuiaqatigiinnut. Ilaqutariit nuna qimallugu nuunneri tamaasa aki akisunerpaaq akilertarparput pisortat ajornartorsiutinik iluarsiisinnaannginnerat pissutaalluni uffa inuit ataasiakkaat ilaqutariillu ulluni naliginnarni toqqissisimasuunissaannut tamanna pingaarutilerujussuugaluartoq. Pissutaasinnaavoq meeqqat/inuusuttut tarnikkut nappaateqarnerisa paasiniarneqarneq ajornerat, meeqqat atuarfiani pitsaassutsip appasippallaarnera, meeqqat meeqqerivinni paarineqartarnissaannut qularnaarisoqarneq ajornera, soraarninngornerup kingorna atukkat ajorpallaarnerat, peqqinnissakkut neqeroorutit ikippallaarnerat, taalaassagutsigit assersuutimininnguit tigussaasut. Paarlattuanik siunissami ilaqutariinnut illoqarfiup salliutinnissaa sulissutigisariaqalerparput” taama oqarpoq Anna Wangenheim.
Pissusiviusut qiviariartigit – atorsinnaanngitsut atoqqittariaqanngillat
Kommuneqarfik Sermersuumi innuttaasut amerliartornerat qularnaassagutsigu iliuusissanut pilersaarusiornissarput pinngitsoorsinnaanngilarput qularnaarniarlugu tungiuinerup pitsaasuunissaa. Nuummi ineriartorneq unitsinneqarsinnaanngilaq – kisianni ataqqineqaatissarsiorluni pilersitassarsuit isumaqatigiissutigineqallaraangata ulluinnarni inuunitsinni pingaarutillit puigorneqartarput. “Taamaattumik pissusivisusut qiviartariaqarpagut” puigornagillu illuinnarni inuunitsinnut pingaarutillit – meeraanitsinni toqqissisimanissarput pingaaruteqarpoq inuiaqatigiit ineriartornerat peqqinnartoq qularnaassagutsigu. Tassani ataatsimoorpgut, pisuut piitsullu meerartatsinnut neqeroorutit eqqarsaatigalugit. Isumaqarpugut kikkut tamarmik assigiimmik imminut napatissinnaanissaminnut periarfissaqartinneqartariaqartut aamma siunissami, – tamannalu tungiuinitta qularnaartariaqarpaa.” Taama oqarpoq Anna Wangenheim. Taamaattumik anaananngortussanut ilaqutariinngortussanullu iliuuseqarasuartarnissanut pilersaarutit salliutittariaqarpagut, meeqqat periarfissaqarsinnaaqqullugit peroriartornermi angajoqqaamik ajornartorsiutaannik kingornussinnginnissaat. Akissaqanngilagut pingaarnersiuinerlunnerit uteqqinnissaannut.
Meeqqeriviit ilungersorput: Aaqqiissuteqapallattariaqarpugut aamma perorsaasut akissarsiaat qaffattariaqarput
Ukiuni amerlavallaani angajoqqaat meeqqeriviinniittuutillit isumaalullutik naammagittaalliortut tusaajuarpagut. Perorsaasunut ikiortit suleqatissaalitsipput aamma nutaanik nangilersuisinnaasunik, meeqqanik nerisitsisinnaasunik, meeqqat atisaannik taarsiisinnaasunik amingaateqarput immikkullu amingaatigineqarput aqutsisut ersarissut aqutsilluartullu aamma akisussaaqataallutik pikkorissunik sulisussarsioqataasinnaasut amingaataapput. Inatsimmi aalajangersarneqarput suliat kusanartuunissaat pitsaasuunissaallu, piviusulli allarluinnaapput. MEERARTAGUT siunissaraagut – oqaaseqatigiiuppulli atornerlunneqartartut taasisussarsiornermi, piviusuuvorli naalungiarsuit pisariaqartitaminnik perorsaanikkut neqeroorfigineqarsinnaanngimmata atualernissaminnut.” Perorsaasut suliffissaannut uterteqqittariaqarpagut akissarsiaqartilerlugillu akiligassanut akiliissutigisinnaasaannik. Inuiaqatigiittut perorsaasut ataqqinerusariaqarpagut inuiaqatigiinni minnersagut sullimmatigit pingaarutilerujussuarmik. Taamaattumik kattuffii, ilaasortat sulisullu ilungersortut ullumimut naleqqiullugu tusarnaarnerusariaqarpagut.” taama oqarpoq Anna Wangenheim nangillunilu: ” Eqqarsaatigineqarsinnaapput namminersortut kommunillu aqutaannik angerlarsimaffinni paarsisoqartalernissaa. Perorsaasut siunnersortissatut atorfinitsinnerisigut nukiit atorluarneqarnerusinnaapput qularnaarumallugu angerlarsimaffinni paarsisartut amerlanerusut eqaannerusumik aaqqissuussisinnaasut. Pilersitsiniarnerup nalaani utaqqiisaa angajoqqaap aappaa angerlarsimaffimmi paarsigallartinneqarsinnaavoq, ernereernerup kingorna, kommunip akiligaanik qularnaarniarlugu meeqqap paarilluarneqarnissaa meeqqerivimmi angerlarsimaffimmiluunniit paarsiffiusumi inissaqanngikkallartillugu. ” Ullumikkut angajoqqaat napparsimanertik pissutigalugu sulinngikkallartut, feeriartulluunniit angerlarsimaffinni paarsisariaqartarput nammineq akilerlugu, allamik paarsisussaqannginneq pissutigalugu – eqqortuusinnaanngilaq angajoqqaanngorlaat suliffillit taamatut toqqissisimananngitsumik qularnartortalimmilllu neqeroorfigineqartarmata. Inuiaqatigiit soqutigisarisinnaanngilaat angajoqqaat sulisinnaasut angerlarsimatiinnarartarnissaat aamma meeqqamut toqqissisimanartuusinnaanngilaq ullut tamaasa takornartamut tunniunneqartarneq. Pitsaanerusumik aaqqiisariaqarpugut!”
Pitsaassuseq meeqqat atuarfianni – atuartinnut ataasiakkaanut kiffaanngissuseqarneq isaalli aamma atuarfinnut siulersuisut oqaasissaqarnerulersinneqarlik
Meeqqat atuarfiat pillugu Inatsit tunngavimmigut angisuumik periarfissiivoq, taamaasilluni atuarfiit ataasiakkaat sunniuteqarfigisinnaavaat atuartunut sinaakkutit qanoq ittut pilersissanerlugit. Taamaattumik eqqarsarunnaartariaqarpugut ingerlatsivik aqutsisuussasoq annerpaamillu pissaaneqarluni – atuarfinni pisortat sapinngillat atuarfinni ataasiakkaani siulersuisut suleqatigalugit. Atuarfiit ataasiakkaat aalajangersinnaasariaqarpaat atunngiffiit pinissaasa pilersaarusiornissaat il.il. naleqartitat piviusut tunngavigalugit. Suut tamarmik qitiusumiit aqunneqartariaqanngillat. Ingerlatsiviup qularnaassavaa atuarfiit inatsisinik malinninnissaat aamma qaffasissutsip innarlinnginnissaa, paarlattuanik ilisimasaqassuseq qaffassarneqassaaq atuarfiit namminneq aalajangiisinnaasunngortinnerisigut. Anna Wangenheim naapertorlugu aammaarluni pineqarpoq kukkusumik qitiusumiit aqutsineq. “Tunngaviusumik pivarput sulisut ataasiakkaat aamma atuarfiup pisortaata naammaginartumik isumaginnissinnaanerannut tatiginninnissaqm qimallugu atuarfiit kiffaanngissuseqarnerannut nakkutilliinissaq naleqartitat tunngavigalugit sinaakkusersuinikkut.”
Tulliullugu isumaqarpoq atuarfinnut siulersuisut sulinerat nukittorsartariaqartoq, tassani angajoqqaat angisuumik periarfissaqartilerlugit atuarfiup atuartunut neqeroorusiortarneranut sunniuteqarnissaannut. Angajoqqaat akuutinneqarnerulernerata kinguneranik atuarfiup angerlarsimaffiullu akornanni ataqqeqatigiinneq paaseqatigiinnissarlu anginerulersinneqarsinnaapput atuarfiup ilikkarnissaanut ineriartornissaanullu kinguneqarluartumik.
Angajoqqaat suliffillit sulinerminni atugaat allanngortillugit
Suliffiit sulisitsisullu angajoqqaat suliffillit pisariaqartippaat – taakkuuppummi sulliviup isertitaqarnissaanut qularnaarisussat. Taakkuupput sulliviup ingerlaannarnissaanut qularnaarisut. Taamaattumik avaqqussinnaanngilarput inuiaqatigiit soqutisarilluinnarmassuk, angajoqqaat suleqqilernissaat. Demokraatini qularnaarusupparput ilaqutariit meerartallit sulinerminni atugarissaarnerulernissaat. Periarfissaqartariaqarpoq sivikinnerusumik sulisinnaanissaq, akissarsiatigut ilanngaanneqanngikkaluaruni. Nunani allani assigiinngitsuni misissuinerit takutippaat, ullup ilaannaa sulisartut tunisassiornerusartut, eqiasuinnerusartut aamma napparsimakulannginnerusartut, ullup ilaannaa sulisaleraangamik. Meeqqamut ataatsimut arlalinnulluunniit angajoqqaajungaanni inuiaqatigiinnut iluaqutaassagaluarpoq, periarfissaq taasarput ammaanneqartuuppat. Sualummik nalunagu angajoqqaarpassuit qitornaq napparsimatillugu angerlarsimaannartarnerat, atuarfimmi susoqassatillugu sullivimmik qimatsigallartarnerat, sunngiffimmi il.il. Taamaattumik inuiaqatigiittut illoqarfissuarmi ineriartupiloortumi ilaqutariinnut pitsaanerusussaq ujartortuartariaqarparput tassani piffissaalatsineq ilaqutariippassuarnut meerartalinnut ajornartorsiortitsisinnaasarmat.
Sunngiffik naleqarnerungaartoq – sinaakkutissat pilersinneqarlik aamma pinaveersaartitsisa
Ileqqut kusanartut pinaveersaartitsisarput aamma inuiaqatigiinnik peqqissunik pilersitsisarput. Ilaqutariit meerartallit periarfissaat qissimeqqilaassagutsigit periarfissillugillu meerartamik inuunerinik tapersersuilluarnissaannut atuarnerat sunngiffimmilu susarnerat eqqarsaatigalugit, taava inuiaqatigiittut sinaassutissanik eqaatsunik qeratasuunngitsunik aaqqiisariaqarpugut, piffissaqarfigitilerlugit pitsaasunik aallutaqarnissaannut, qasujaallisartarnissaanut taamaasillutalu peqqissutsikkut ajornartorsiutaalersinnaasut millisarlugit nassataanillu tungiuinikkut aningaasartuutit sipaarfigalugit. Timersortarfiit amerlanerusut pitsaanerusullu pilersinnerisigut, sunngiffimmi pinngortitamik atuisinnaanermut periarfissat, paarnat naatitallu akitsuutaasa peernerisigut aamma naatitat, paarnat neqillu mingutsitaanatik pissusissamittut ineriartortitaasimasut akitsuutaajarnerisigut innuttaasut peqqinnerusut pilersissavagut. Nunap immikkoortuani siulittaasup naggataatigut ima oqarpoq: “Suut tamarmik ataqatigiipput. Suniaruit namminerluinnaq aalajangissavat. Iliuutsivilli tamatta sunnertarpaatigut. Taamaattumik peqqinnartoq qineruk, illit imminut kisivit pinnak aammali meeqqatit, ilaquttatit eqqaamiutillu pillugit”.
