Nunatsinni pissutsit imaalernikuupput sulisussanik amingaateqalersimalluta illuliortiternerit sanaartugassanillu suliassat ingerlanneqartut amerlalluinnarmata. Tamanna politikkikkut piaartumik aaqqiivigisariaqarparput. Demokraatini isumaqarpugut iliuuseqarnerusariaqartugut nunatsinni suliffissaqanngitsut sulisilernissaannut peqataanillu ajornannginnerulersillugu nunanit allaniit eqaannerusumik sulisussarsiortarnissarput.
Nunatsinni pissutsit imaapput sumiiffinni assigiinngitsuni pingasuni mittarfissualiortoqartussanngorluni. Tamatuma saniatigut Nuuk City Development aamma aallarnisalerpoq angisuumik atuarfiliussalluni aamma sineriak tamakkerlugu inissianik aserfallattaaliineq suli pisariaqarluinnarpoq. Taava aamma puigussanngilarput assersuutigalugu aalisakkerivinni sulisussanik amingaateqaratta aamma taamaappoq neriniartarfinni kiffartuussinermillu suliallit akornanni.
Tassa imaappoq kikkulluunniit sulisinnaasut pissarsiariniartariaqarpagut aamma suliffissaaleqisut tamaasa sulisileraluarutsigilluunniit sulisussanik naammattut pigilernavianngilagut. Tamanna tunngavigalugu allatut ajornartumik akuerisariaqarparput avataaniik sulisussanik tikisiortortitsinissaq pisariaqarluinnarmat.
Demokraatinut pingaaruteqarpoq ilummut qiviaqqaarnissarput. Allatut ajornartumik sulisinnaasut arlaannilli pissuteqarlutik suliumanatik pisortat ikiorsiissutaannik nappateqartut, sulilersinnissaat pikkoriffiginerusariaqalerparput. Inuit tamakku sulilersinniarlugit pinngitsaalisariaqarput aamma ikiorsiissutaannut kinguneqartariaqarpoq suliffissarsissunneqarnerminni naaggaasagaluarpata imaluunniit piaaralutik suliffittaatik paariumanngippatigit. Tamatuma saniatigut sulisartut ajornannginnerusumik nuttarsinnaanissaat qularnaartariaqarparput. Sumiiffimmiik sumiiffimmut suliartorluni nuunnissaq ajornannginnerulertariaqarpoq. Tassunga atatillugu assersuutigalugu nuttarnermut ikiorsiissutit atorneqarsinnaalluarput.
Iliuusissalli taakku naammaqqajanngillat atorfiit tamaasa inuttalersussagutsigit. Pissutaavoq ilaatigut ikittunnguugatta aamma sulisartut piginnaaneri suliffeqarfiit pisariaqartitaannut naapertuutinngimmata.
Tamanna tunngavigalugu pingaaruteqarpoq, eqaallisaanissarput suliffeqarfiit avataaniit sulisussarsiorsinnaalersillugit. Puigussanngilarput tunisassiorfinnit sulisussaqannginnerup kinguneranik tunisassiorneq innarlerneqartarmat, tamannalu tamatsinnut kalluaasarpoq. Demokraatini taamaattumik siunnersuutigissavarput Naalakkersuisut piaarnerpaamik sulisitsisut kattuffiinik oqaloqateqassasut siunertaralugu aaqqiinissaq sulliviit iluaquserumallugit taamatullu nunarput ataatsimut iluaquserumallugu.
Tamatuma saniatigut pingaaruteqarpoq annertuumik illuliortitertoqartillugu sanaartugassanillu suliassaqartoqartillugu annertuumik ingerlatsinermi tunngaviit atorneqartarnissaat. Tunngaviit periarfissaqalersitsisut avataaneersunik piffissami aalajangersimasumi akikitsumillu sulisinneqarsinnaasunik tikisitsisarnissaq malittarisassat ersarissut naapertorlugit. Tamatuma ilaatigut kingunerissavaa akit akissarsiallu qaffariartupiluulersinnaanerinik pinngitsoortitsinissaq, aningaasartuutit sapinngisamik appasinnerpaaffimmiitissinnaagatsigit taamaaliornikkut. Suliassaqarpallaarnerup kinguneranik akit akissarsiallu qaffariartortarnerat avannaani takoreerparput pisortat sanaartortitsiniarnerigaluat unitsinneqarmat, sanaartortut malinnaasinnaannginnerat pissutaalluni kvadratmeterimut akit allaat 40.000 koruunit 60.000 koruunillu akornanniilerluni. Pissutsit taamaattut nunatta sinneranut siaruaateriaannaapput, mittarfiliortiternerit aalklartippata.
Tamanna tunngavigalugu pingaaruteqarpoq uangut politikerit iliuuseqarsinnaassutsitsinnik takutitsinissarput sulisussaaleqineq pissutigalugu ajornartorsiutit aaqqinniarlugit peqataanik akit aningaasarsiallu qaffannginnissaat qularnaarlugu.
Inussiarnersumik inuulluaqqusillunga
Steen Lynge
Demokraatit sinnerlugit Inatsisartunut ilaasortaq
