DEL

Partiit tamarmik isumaqatigiissutigaat amerlanerit pitsaanerusumik ilinniarsinnaasariaqartut. Aamma isumaqatigiissutigaarput meeqqat atuarfia pitsaanerusinnaasoq. Tamannali pitsanngorsinnaanngilaq meeqqeriviit iliuuseqarfinginngikkutsigit, tamannali politikkikkut puigorneqartuaannarpoq. Meeqqeriveqarneq ukiorpassuarni sumiginnarneqarnikuuvoq, kingunerisarpaalu meerarpassuit atualernissaminnut piareersimasannginnerat. Ajornartorsiut angisooq takunngitsoorneqartuartorlu Demokraatini sukkanerpaamik iliuuseqarfiginiarparput.

Qitornaqartugut nalunngilarput allanut naalugiarsuutitta paaritinnissaa qanoq artornartigisartoq. Anaanap kialluunniit qularutiginngisaannarpaa erneq panilluunniit anaanamiikkunik toqqissisimanerpaasussaasut. Kisianni piviusumi suliartortariaqartarpugut ilaquttat akissaqaqqullugit. Taamaappoq aamma tamanna immini ajunngilaq.

Nunatsinnili ajornartorsiut imaannaanngitsoq tassaavoq meeqqagut tunniuttariaqartaratsigit inunnut ilinniagaqanngitsunut meeqqatta qanoq toqqissisimanissaannut, qitornattalu meeqqerivimmiinnerini isumannaatsuunissaannut aamma akunnerpassuarni ilinniartinnissaannut immikkut ilinniagaqarsimanngitsut.

Qularinngilluinnarpara sulisut ajunngitsuummata asannittuullutillu aamma sapinngisannguaminnik meeqqatta misigisaqarluarnissaat sulissutigisaraat. Nassuerutigisariaqarparpulli naammanngimmat. Aamma pisariaqartipparput meeqqatta ajunngitsumik sunnerneqarnissaat, pinnguarneq ilinniarnerlu aqqutigalugit meeqqat atuarfianni piareerlutik aallartittarniassammata.

Politikkikkulli ukiorpassuarni anginerusumik iliuuseqartoqarnikuunngilaq, alla pineqarnikuunnginnami taamaallaat meeqqat atuarfiat. Kisianni tusaalaariaritsi? Meeqqat atuarfiani ajornartorsiutit aaqqikkunnanngilagut peqataanik atualertussat ajornartorsiutigsartagaat iluarsiiviginngikkutsigit.

Tasssa perorsaasut sakkussani pingaarnersaarput. Taamaattumik qularnaaqqaariartigu perorsaasunngorniartarnerup pilerinartunngortinnissaa perorsaasutullu sulinerup pilerinartunngornissaa. Ullumikkummi taamaaqqajanngilaq. Allatut ajornartumik perorsaasunngorniartarfimmi ilisimasassat pitsaassusaat qaffassartariaqarparput, qularnaarumallugu inuit meeqqatsinnik paarsisussat suliaminnut pikkorissuunissaat. Qularnaartariaqarparput meeqqeriviit suliatik iluamik suliarisassagunikkit naammattunik sulisoqartarnissaat. Aaqqiissutissanut ilaavoq amerlanerit perorsaasunngorniartalernissaat.

Tulliatut perorsaasutut naammassigaangamik ilinniakkaminnut siunertalimmik sulerusussuseqartariaqarput. Sulinermi atukkat akissarsiallu ullumikkut ajorput. Aaqqittariaqarpagut. Qularnaartariaqarparput perorsaasut ilinniarnermik sivisussusaanut tulluuttumik akissarsiaqartinneqarnissaat. Isumaqarpunga perorsaasut ilinniartitsisutut imaluunniit peqqissaasutut akissarsiaqartinneqartariaqartut, perorsaasunngorniartarneq ilinniakkanut assigusunut naleqqiullugu kingulliunneqartuassanngippat.

Naggataatigut oqaatigisariaqarpara angajoqqaat aamma mikinngitsumik akisussaaffeqarmata. Piumasarisinnaangilarput inuiaqatigiit sunik tamanik isumaginnittuusassasut. Angajoqqaatut ersutassap ilaa tigusariaqarparput.

Meeqqagut perorsartariaqarpagut. Ilinniarttariaqarpagut eqqortoq kukkusorlu pillugit. Paasitittariaqarparput atuarneq nuannersuusoq. Nerisittariaqarpagut. Isumagisariaqarparput sinilluartarnissaat. Isumagisariaqarparput pinnguaqatigisarnissaat. Isumagisariaqarparput isumagilluarnissaat. Asarujussuartariaqarpagut. Naatsumik oqaatigalugu naammassisariaqarparput qitornatsinnut asannilluta isumassuilluarlutalu angajoqqaajunissarput.

Meeqqalli paarilluarnissaat isumagisinnaanngilarput allanik ajornartorsiuteqarutta. Atornerluinerusinnaavoq, sulinermut attuumassuteqarsinnaavoq, soorlu stresserneq, aningaasatigut ajornartorsiutit, avinnerluunniit. Tassani sulissutiginerusariaqarparput ilaqutariit qanoq nukittorsassanerlugit. Uanga nammineq siunnersuutigerusuppara ilaqutariinnut siunnersuisarnissaq, neriullunga piviusunngortinneqarumaartoq.

Imaanngilarli sutigut tamatigut immitsinnut ikiorniassasusugut. Eqqaamatigu immitsinnut eqqumaffiginissarput aamma aperisarnissarput.  Immitsinnut isiginerusariaqarpugut aamma qanoq ilutsinni innerluta. Tamatumap ajornartorsiutit tamaasa tammartikkunnanngilai, ajornartorsiutilli ilaannannguiluunniit aaqqissinnaagutsigit, alloriarujussuassuugut.

Eqikkalaarlakka: angajoqqaatut inuiaqatigiittullu allatut ajornartumik meerartagut atualernissaanut piareersartariaqarpagut aamma ilikkagaqarnissaannut. Akisussaaffeqarpugut, akisussaaffillu tigusariaqalerparput. Taamaaliorutta kinguaariit pilersissavagut atualilereerlutik inerereersimasut atulernissaminnut aamma ilikkagaqarnissaminnut. Aamma tamanna angusinnaavarput peqataanik meeqqat atuarfiani ajornartorsiutit aaqqissinnaagutsigit.

Akissaqanngilagut atualertussat sumiginnartuarnissaannut.

Inussiarnersumik inuulluaqqusillunga

Nivi Olsen
Inatsisartunut ilaasortaq
Demokraatit / Demokraterne

Kontakt Os / Attavigisigut

Vi er ikke tilgængelig lige nu. Men du kan sende os en e-mail, og så vender vi tilbage til dig hurtigst muligt. Massakkut pissarsiarisinnaanngikkutsigut e-mailerpigisinnaavatsigut, uterfigissavatsigit piaarnerpaamik.

Atuarneqarsinnaanngila? Teksti allanngoruk. captcha txt