Sulinermi isummat tunngavigisat

Demokraatit partiiupput liberaaliusut, inuit akunnerminni pissusiinut tunngasunik aamma killilersuerusunngitsumik sammiveqarnermik assigiimmik pingaartitsisut. Demokraatinut immikkoortut taakkua marluk imminnut akerleriinngillat – imminnulli toqqammaviullutik.

Demokraatit isumaqarput inunnik isumaginninnermut aaqqissuussineq piumasaqaatitaqartumik akisussaassuseqarluartumillu aqutaasoq nigartakitsoq innuttaasullu iluamik ingerlasut inuussutissarsiornerup naammassisaqarluarsinnaasup tunngavigigai.


Siullermik upperivarput inuit ataasiakkaat Namminersorlutik Oqartussat Inatsisartunilu amerlanerussuteqartut suliarisinnaasutut upperinninneranniit annertunerujussuarnik suliaqarsinnaasut.

Demokraatit isumaqarput innuttaasut namminneq qanoq inuunertik aaqqissuukkumanerlugu aaliangissagaat. Amerlasuutigut innuttaasut eqqortumik misigisarpaat Nuummi aaliangiisoqarpallaartartoq. Eqqarsartaaseq taanna qimassavarput.

Demokraatit isumaqarput politikerit inuiaqatigiit qanoq aaqqissuunnissaat toqqammavilersussagaat, taava innuttaasut pisinnaasartik naapertorlugu immersornissaa suliassaralugu. Aamma isumaqarpoq ajornartorsiutinik takkuttoqassagaluarpat aaqqinnissaat nammineq isumagineqassasoq, Namminersorlutik Oqartussat aningaasanik tapeeqqullugit qinnuigiinnarnagit. Taamatut isumaqarneq imminut tatigisinnaanermut aserorsaataavoq, unammillernartormi sapernagu paasigaanni soorunami nuannaarneq annerusarpoq. Imminut tatigineq annertusisarpoq – tamanut iluaqutaasumik.


Demokraatinut pisinnaatitaaffiit pisussaaffiillu immikkoortuupput pissusissamisoortut inuiaqatigiitsinni annertunerusumik ersarittussat. Ukiuni amerlavallaani pisinnaatitaaffiit assut pingaartillugit isiginiarneqarsimapput. Ukiuni aggersuni Kalaallit Nunaanni innuttaasutut pisussaaffitta pisinnaatitaaffittalu ersarissut erseqqissunik oqaasertaliornissai inuiaqatigiittut pikkoriffiginerulissuagut.

Aana assersuut Demokraatit qanoq isumaqarnerannik takutitsisoq. Ilinniagaqarnermik aallartitsigaanni taava ilinniagaq aamma naammassineqassaaq. Sullissinermi annertooq atatittuaannassagutsigu innuttaasut piumasaqarfigineqassapput. Pisinnaatitaaffiit pisussaaffiillu imminnut qanoq ataqatigiinnerannik tamanna assersuutaavoq.

Allatut oqaatigalugu Demokraatit piumasaqartarnermik eqqarsartaaseq, piumasaqaannartarluni namminerlu pilliuteqassanani, qimattariaqartoq. Demokraatit ima taagorpaat: Imminut akisussaaffigeqatigiinneq – kinguaariinnullu tulliuttunut.

 

Inunnik isiginnittaaseq

Demokraatinut inunnik isiginnittaaseq isumalu inuunermi najoqqutarisaq immikkoortuupput marluk imminnut ingiaqatigiittut. Inuuneq qanoq isiginerlugu aaliagiisuusarpoq qanoq inuit allat isigisarnerannut.

Kiffaanngissuseqarneq, akaarinneqatigiinneq aammalu kinaassusersiortuunnginneq tassaajuarsimapput – tassaajuassallutillu – Demokraatit ilisarnaataat.

Demokraatit pingaartippaat inuit tamarmik naleqassusertik ilisimassagaat aammalu naleqartinneqartutut misigisimassasut. Taamaaliornikkut inuit inuiaqatigiillu imminnut pitsaanerpaamik tapersersorsinnaassapput ineriartortinnissaminnullu tapersersoqatgiillutik.

Demokraatit politikkikkut inunnik isiginneriaaseq liberaaliusoq nersugaraat, tassani inuit tamarmik sapinngisaq tamaat akisussaaffigalugu namminneq inuunertik inuusertillu. Tassunga aamma ilannguttariaqarpoq inuiaqatigiittut inunnik isumaginninnikkut akisussaafferujussuaqarnerput inuiaqatigiinni sanngiinnerusut ikiorneqarnissartik pisariaqartivikkaangamikku.

Demokraatit ataasiakkaatut isummersorsinnaanermut kiffaanngissuseq innarlersinnaanngilluinnartutut isigaat taamaaliornikkullu isumaqarpugut kikkut tamarmik pisinnaatitaaffeqassasut ataasiakkaatut isumaqarnissamut isummersorsinnaanermullu. Demokraatit isumaqavipput taamatut isummakkut avammut ammaneq nutaaliorsinnaaneq annertunerpaaq pilersissagaa qulakkeerlugulu inuit akornanni assigiinngisitaarneq inuiaqatigiinnut multikultureliusunut kikkunnik tamanik inissaqartitsisumik tunngavisseeqqittussaq.

Inuup kialluunniit pisinnaatitaaffigivaa kinaassutsini nammineq nassuiaasissallugu inuiaqatigiinnilu inissani pilersissallugu. Inuillu tamarmik pisussaaffeqarput inuiaqatigiinnut pisariaqanngitsumik artorsaatissiinnginnissaq. Naatsumik oqaatigalugu isumaqarpoq tunniussaqarsinnaaguit tunniussaqassasutit. Kinaluunniit tunniussiumanngittariaqanngilaq allanullu sulinissaq isumagitillugu.

Demokraatit qulequttat suulluunnit eqqarsaatigineqarsinnaasut atorniarpaat kikkut tamarmik pisinnaatitaaffii qulakkiissallugit illersorniarlugulu kikkulluunniit namminneq kinaassuseqarnissaat. Tamanna isumaqarpoq Demokraatit assersuutigalugu ikinnerussuteqartut illersortuaannassagaat.

Ilaannut qasunartutut isiginarsinnaavoq kisiannili inunnik isiginnittaaseq inuunermilu isuma najoqqutassiaq susassaqarfinni tamani saqqumilaaginnavittuupput taamaattumillu sorsuutigineqaannavissaaq inunnik isiginnittaaseq akaarinnittoq, siumut isigisoq ineriartortitsisorlu.